Nach de Fasnacht isch es uf eusere Homepage sehr still worde .... ZU STILL. Aber das het au en Grund: Es isch viel passiert:

  • Nach de Fasnacht isch vor de Fasnacht
  • Stifte Info-Abig
  • Eishockey-Spiel Tambure/Wadin/Trubi
  • Gschäftlichi & gmüetlichi GV
  • Probestart am 13. Mai

Nach de Fasnacht isch vor de Fasnacht

Mir hend zum erste Mal nach de Fasnacht euses Vereinsjahr 2018/2019 Revue passiere lah und hend festghalte, was guet isch und was verbesseret werde chan. Debie sind ganz vieli Idee und Vorschläg cho, wo mir versuchet im neue Vereinsjahr umzsetze.

Stifte Info-Abig

Am 1. April hend sich alli Interessente und es paar vom Vorstand im Cafe City troffe. Es isch informiert worde, was uf eim zuechunnt, wenn mer bi de Trubis wot mitmache. Vo Gwändli nähe über Chilbi-Ihsätz bis Instrumente-Wünsch isch alles ahgsproche worde und als Resultat dörfet mir 12 Neumitglieder begrüessen: Urs Achermann, Natalie Bruhin, Anina Dolder, Katharina Eberle, Angela Faoro, Jan Höhn, Bianca Kohlfürst, Reto Landis, Martina Oesch, Pascal Schreiber, Simon Schreiber und Nicole Wyss ... Allne es herzlichs Willkomme bi de Trubadix!

Eishockey-Spiel Tambure/Wadin/Trubi

Am 8. April hets den gheisse: "Ab uf d'Schliefschue oder als Fan uf Tribüne go ahfüüre". D'Tambure, Wadinschränzer und Trubadix hend 2 gmischti Teams formiert und so hend die Blaue gege die Orange uf em Iisfeld vo de Bosshard-Arena in Zug 2 Stund gspielt, bis all kei Schnuf meh gha händ. Wer gunne het isch hüt no unklar, aber de Spass isch unbezahlbar. Dezue gits au no es paar Fotos.

Gschäftlichi & gmüetlichi GV

A de gschäftliche GV Endi April isch:

  • S'neui Gwändli vorstellt worde
  • Alli Stifte ufgnoh, 1 Ustritt und 1 Dispense gmeldet worde
  • de Probebeginn verschobe worde vom 20:00 uf 19:30

Am Samstig druff sind mir denn fein go Esse im Rest. Nöihüüsli in Wädischwyl.

Probestart am 13. Mai

Da mir soviel Neumitglieder hend und dezue no es paar Instrumentewechsel ahstönd het de Spieli entschlosse scho am 13. Mai mit de freiwillige Probe ahzfange. Die hend sich bereits bewährt und mer dörf gspannt sie, wie das i de nächste Saison töne wird.

 Eue Schriberling